Clique

Clique-Gschicht

Mir Trotzchöpf sy 1982 usere Cliquespaltig entstande. Wyll mir ebe trotzdäm hai welle Fasnacht mache, isch der Name Trotzchöpf entstande. Im 1983 hai mir denn s erscht Mool als „Trotzchöpf Lieschtel“ an der Fasnecht z Lieschtel mitgmacht. Sythäär hai mir an jedem Umzug in Lieschtel mit eme eigene Sujet teilgnoo - emol mit es Bitz mee, emol mit es Bitz weniger Trotzchöpf. Aber immer sy mir mit grosser Freud und „Engagement“ derby gsi. Öisi Clique bestoot zur Zyt us vier Pfyffer, eim Tambour, Vorträbler und eusem Nochwuchs, de Chinder. Toll fände mirs, wenn mir es paar neuji Fasnächtler in öisne Reije chönnte begrüesse. Mir sy im Alter zwüsche 30ig und 65ig und hais immer luschtig zämme! Mälde chasch Du di ganz unverbindlich under „Kontakt“.

     

D Gselligkeit ghört by öis genauso zum Vereinsläbe wies Üebe vo nöje Märsch. Underem Joor dräffä mir öis regelmässig zur Üebigsstund im Fraumattschuelhuus, ebefalls dräffe mir öis au no zume „Summernachtsplausch“ und ämene „Wyyenachtsässe“. Euses Sujet döje mir jewyls im Herbscht zämme bestimme. E gweelti Sujetkommission duets denn wyter usarbeite. In der Regel mache mir alles sälber bis uf d Larve. Mir mache immer vor der Fasnecht e Cliquewärche, was natürlich die gmeinsami Vorfreud uf d Fasnecht no mee duet schüüre. Nit z vergässe isch natürlich au öisi stattlechi Latärne, wo bis jetzt fascht jedes Joor derby gsi isch. Au in Die inveschtiere es paar Mitgliider vo öis einigi Stunde Arbet, bis si so stolz cha duurs Stedtli zoge wärde. Zum Glück hai mir au no es paar begabti Dichter in der Clique, wo derfür Sorge, dass mir jedes Joor e Zeddel chönne verteile.

Wie de gseesch, sy mir e bunte Huffe - vellicht au mit es paar Chaote. Hets Di jetzt öbbe gluschtig gmacht, um au by öis mitzmache?

Mir fröjen öis uf jede nöje Trotzchopf – glych, öb mit Piccolo, Drummle oder als Vorträbler!